የፈለገ ሕይወት ሰንበት ትምህርት ቤት ታሪክና አገልግሎት

የፈለገ ሕይወት ሰንበት ትምህርት ቤት የምሥረታ ታሪክ

የሆሳዕና መንበረ ጵጵስና ደብረ ገነት ቅድስት ድንግል ማርያም ቤተክርስቲያን ፈለገ ሕይወት ሰንበት ትምህርት ቤት የምሥረታ ታሪክ ሰንበት ትምህርት ቤት የዖታ የዕድሜ ገደብ ሳይደረግበት ክርስቲያኖች በዘመናቸው በዕለተ እሁድ እየተሰበሰቡ መሠረት የሆነውን የቤተክርስቲያን ሃይማኖት ትምህርቱን፣ ትውፊቱን፣ ታሪኩንና ሥነ-ምግባር እየተማሩ በመንፈሳዊ ሕይወታቸው ጠንካራ ሆነው የሚያድጉበት፤ መልካም ዜጋን የሚያፈሩበት፤ ሥርዓተ ቤተክርስቲያን የሚማሩበት፤ ለቤተክርስቲያንም ለሃገርም መልካም ትውልድ የሚፈራበት በእንቅስቃሴያቸውም ሆነ በመልካም ሥራቸው አርአያ የሚሆኑ በየአካባቢው በሚሄዱበት ቦታ ወንጌልን ትውልድን የሚያስተምሩ መንፈሳውያንን የምታፈራ ናት። የሆሳዕና መንበረ ጵጵስና ደብረ ገነት ቅድስት ድንግል ማርያም ቤተክርስቲያን ፈለገ ሕይወት ሰንበት ትምህርት ቤትም በመልካም ስማቸው ከሚጠቀሱ ሰንበት ትምህርት ቤቶች ተጠቃሽ ነው።

በብፁህ ወቅዱስ አቡነ ጎርጎርዮስ የወንጌል አገልግሎት የፈሩ በአከባቢው የነበሩ የሳቸው የመንፈስ ልጆቻቸው የመሰረቷት የሆሳዕና መንበረ ጵጵስና ደብረ ገነት ቅድስት ድንግል ማርያም ቤተክርስቲያን ፈለገ ሕይወት ሰንበት ትምህርት ቤት እንደ ሰንበት ትምህርት ቤት የተመሰረተችው በመስከረም 21 ቀን 1981 ዓ.ም በወጣት ወንድማገኝ ሾላ በአሁን ስማቸው ቆሞስ አባ አብርሃም አማካኝነት ተመሰረተች በወቅቱ ምንም አይነት መሰባሰቢያ ቤት ባይኖራቸውም በቤተ ክርስቲያኑ ቅጥር ግቢ እየተገናኙ የምስጢራተ ቤተ ክርስቲያን፣ ትምህርተ ሃይማኖት ፣የቤተ ክርስቲያን ታሪክ በዓለም መድረክ እነዚህን ትምህርቶች መምህራንን በመመደብ ያስተምሩ ነበር ። የደብሩ የሰንበት ትምህርት ቤት አባላት እየጨመሩ በመምጣቱ ሲሰባሰቡበት የነበረው ደጀ ሰላም እየጠበበ ሲመጣ የሰንበት ትምህርት ቤቱ አባላት ሌላ መሰብሰቢያ ቦታ ለመስራት በሀሳብ ተስማሙ ነገር ግን ይህን ሀሳብ ወደ ስራ ለማውረድ አቅም ስላልነበራቸው ሁሉም ጊዜ በፍቅር ሆነው ይጸልዩ እንደነበር በወቅቱ የነበሩት አባላት ይናገራሉ ።

ከብዙ ፈተናዎች በኋላ በእግዚአብሔር እርዳታ በተለያዩ መንገዶች የገንዘብ ማሰባሰብ ስራ ከተሰራ በኋላ በ1985 ከደጀ ሰላም ወደ አዲስ ሰንበት ትምህርት ቤት መግባት ተችሏል። ነገር ግን ከጥቂት አመታት ቆይታ በኋላ አሁን የተሰራው ሰንበት ትምህርት ቤት ከጊዜ ቆይታ ምክንያት እየፈረሰ ሲመጣ አዲስ ስንብት ትምህርት ቤት የመስራት ሀሳብ እንደገና ተነሳ ስንብት ትምህርት ቤቱም በብፁዕ ወቅዱስ አቡነ መልከፀዴቅ መልካም ፍቃድ አሁን እንደ ቤተ መቅደስ ሆኖ የሚያገለግለውን ሰንበት ትምህርት ቤት በሐምሌ 11 በ1989ዓ.ም የመሰረተ ድንጋይ ተጣላ የሰንበት ትምህርት ቤቱን ስራም ለማጠናቀቅ እንድ አመት የፈጀ ሲሆን በ1990 ስራው ሙሉ በሙሉ ተጠናቆ አገልግሎት ላይ ዋለ። የፈለገ ህይወት ሰንበት ትምህርት ቤት አሁን ላይ ከ500 መቶ ያላነሱ አባላትን በውስጡ በትምህርት እንዲሁም በአገልግሎት በመሳተፍ ላይ ይገኛሉ።